248 உள்ளூராட்சிமன்றங்களுக்கான
வேட்புமனுத்தாக்கல் இன்று ஆரம்பம்
வியாழக்கிழமை நண்பகலுடன் நிறைவடையும்
உள்ளூராட்சிமன்ற தேர்தல் விவகாரத்தில் எஞ்சியுள்ள 248 உள்ளூராட்சி மன்றங்களுக்கான வேட்புமனுத்தாக்கல் இன்று ஆரம்பமாகவுள்ளதுடன் எதிர்வரும் வியாழக்கிழமை நண்பகலுடன் நிறைவடையவுள்ளது.
வேட்புமனுத்தாக்கல் செய்வதற்கான அறிவித்தல் கடந்த நான்காம் திகதி வெளி யான நிலையில் உள்ளூராட்சி மன்றங்கள் 248 இற்கான வேட்பு மனுத்தாக்கல் செய்யும் நடவடிக்கையே இன்று ஆரம்பமாகவுள்ளது.
குறித்த சபைகளுக்கான வேட்பு மனுத்தாக்கல் செய்யப்பட்ட பின்னரே தேர்தல் நடைபெறும் தினம் பற்றிய உத்தியோக பூர்வ அறிவித்தல் வெளியிடப்படவுள்ளமை குறிப்பிடத்தக்கது.
இதேவேளை 341 உள்ளூராட்சி மன்றங்களில் 93 சபைகளுக்கு வேட்புமனுத்தாக்கல் செய்யும் அறிவித்தல் கடந்த நவம்பர் மாதம் 27 ஆம் திகதி வெளியிடப்பட்டது. அதற்கிணங்க குறித்த சபைகளுக்கான வேட்புமனுத் தாக்கல் கடந்த 11 ஆம் திகதி ஆரம்பமானதுடன் 14 ஆம் திகதி நண்பகலுடன் நிறைவுக்கு வந்தது.
இம்முறை தேர்தல் ஊடாக உள்ளூராட்சி 341 மன்றங்களுக்கு எண்ணாயிரத்து முன்னூற்று ஐம்பத்தாறு உறுப்பினர்கள் தெரிவுசெய்யப்படவுள்ளனர்.
இதேவேளை இறுதியாக விகிதாசார முறையில் நடைபெற்ற உள்ளூராட்சி மன்றத் தேர்தலின் போது நாட்டில் முன்னூற்று முப்பத்தைந்து உள்ளூராட்சி மன்றங்கள் இருந்ததுடன் அம்மன்றங்களுக்கு நான்காயிரத்து நானூற்று எண்பத்தாறு உறுப்பினர்கள் தெரிவுசெய்யப்பட்டனர்.
ஆகவே புதிய தேர்தல் முறையூடாக நடைபெறவுள்ள உள்ளூராட்சி மன்றத் தேர்தலில் கடந்த தேர்தலைவிட ஆறு உள்ளூராட்சி மன்றங்கள் மேலதிகமாக உருவாக்கப்பட்டுள்ளன. அகரபதன, கொட்டகல, மஸ்கெலிய, நோர்வூட், பொலநறுவை ஆகிய பிரதேச சபைளும் பொலநறுவை மாநாகர சபையுமே புதிய உள்ளூராட்சி மன்றங்களாக அடையாளப்படுத்தப்பட்டுள்ளன.
0 comments:
Post a Comment