ஜமால் படுகொலை குறித்து சவூதி அரேபியா அளித்த விளக்கம் திருப்திகரமாக இல்லை அமெரிக்க ஜனாதிபதி டொனால்டு டிரம்ப் தெரிவிப்பு

ஜமால் படுகொலை குறித்து

சவூதி அரேபியா அளித்த விளக்கம் திருப்திகரமாக இல்லை

அமெரிக்க ஜனாதிபதி  டொனால்டு டிரம்ப் தெரிவிப்பு

   

பத்திரிகையாளர் ஜமால் கசோக்கி படுகொலை குறித்து சவூதி அரேபியா அரசு அளித்துள்ள விளக்கம் திருப்திகரமாக இல்லை என அமெரிக்க ஜனாதிபதி  டொனால்டு டிரம்ப் தெரிவித்துள்ளார்.

சவூதி மன்னர் சல்மானின் முடியாட்சியை பற்றி கடுமையாக விமர்சித்து வந்தவர், அந்த நாட்டின் பத்திரிகையாளர் ஜமால் கசோக்கி (59). சமீபத்தில் இஸ்தான்புல் நகரில் உள்ள சவூதி அரேபிய துணை தூதரகத்துக்கு கடந்த 2-ம் திகதி சென்ற அவர், மாயமானார்.

அவர் அந்த தூதரகத்துக்குள் வைத்து சவூதி அரேபிய ஏஜெண்டுகளால் கொல்லப்பட்டு விட்டார் என்று பல தரப்பிலும் குற்றச்சாட்டு எழுந்துள்ளது. ஆனால் இந்தக் குற்றச்சாட்டை இதுவரை சவூதி அரேபியா மறுத்து வந்தது.

பத்திரிகையாளர் ஜமால் கசோக்கி மாயமானது தொடர்பாக மன்னர் சல்மான் விசாரணைக்கு உத்தரவிட்டார். சவூதி அரேபிய அதிகாரிகளின் அனுமதி பெற்று, துருக்கி பொலிஸ் அதிகாரிகள் இஸ்தான்புல் துணை தூதரகம் சென்று விசாரித்தனர்.

இதற்கிடையே, இஸ்தான்புல்லில் உள்ள சவூதி அரேபிய துணை தூதரகத்தில் ஜமால் கசோக்கி கொல்லப்பட்டார் என சவூதி அரேபியா உறுதி செய்தது. இதற்கு அமெரிக்கா உள்ளிட்ட நாடுகள் கடும் கண்டனத்தை தெரிவித்துள்ளன.

இந்நிலையில், பத்திரிகையாளர் ஜமால் கசோக்கி படுகொலை குறித்து சவூதி அரேபியா அரசு அளித்துள்ள விளக்கம் திருப்திகரமாக இல்லை என அமெரிக்க ஜனாதிபதி டொனால்டு டிரம்ப் தெரிவித்துள்ளார்.

இதுதொடர்பாக செய்தியாளர்களிடம் பேசிய டிரம்ப், வாஷிங்டன் போஸ்டில் கட்டுரைகள் எழுதி வந்தவர் ஜமால் கசோக்கி. கடந்த 2-ம் திகதி இஸ்தான்புல் தூதரத்துக்கு சென்ற இவர் மாயமானார். அங்கு அவர் படுகொலை செய்யப்பட்டு உள்ளார் என சவூதி அரேபியா அரசு தெரிவித்துள்ளது.

பத்திரிகையாளர் ஜமால் கசோக்கி படுகொலை குறித்த சவூதி அரேபிய அரசின் விளக்கம் ஏற்றுக் கொள்ளத்தக்கதாக இல்லை. விரைவில் உண்மையை வெளிக்கொணர வேண்டும் என்பதில் நாங்கள் அக்கறை கொண்டுள்ளோம் என தெரிவித்துள்ளார்.