சுதந்திரக் கட்சியின் 16 பேருக்கு எதிரான நம்பிக்கையில்லா பிரேரணை திங்கட்கிழமை சபாநாயகரிடம் கையளிப்பு

பிரேரணைக்கு ஆதரவாக வாக்களித்த

சுதந்திரக் கட்சியின் 16 பேருக்கு எதிரான

நம்பிக்கையில்லா பிரேரணை

திங்கட்கிழமை சபாநாயகரிடம் கையளிப்பு

பிரதமர் ரணில் விக்கிரமசிங்கவிற்கு எதிரான நம்பிக்கையில்லா பிரேரணைக்கு ஆதரவாக வாக்களித்த பிரதி சபாநாயகர் திலங்க சுமதிபால உட்பட சுதந்திரக் கட்சியின் அமைச்சர்கள் மற்றும் இராஜாங்க அமைச்சர்கள் 16 பேருக்கு எதிராக இன்று சபாநாயகரிடம் கையளிக்கவிருந்த நம்பிக்கையில்லா பிரேரணையை திங்கட்கிழமை காலை கையளிப்போம் என ஐக்கிய தேசியக் கட்சியின் பாராளுமன்ற உறுப்பினர் முஜிபுர் ரஹ்மான் தெரிவித்துள்ளார்.

சுதந்திரக் கட்சியினர் 16 பேருக்கு எதிராக இன்று கையளிக்கவிருந்த நம்பிக்கையில்லா பிரேரணை தொடர்பில் ஊடகவியலாளர்கள் வினவிய போதே அவர் மேற்கண்டவாறு தெரிவித்துள்ளார்.

இது தொடர்பில் அவர் மேலும் குறிப்பிடுகையில்,

பிரதமர் ரணில் விக்கிரமசிங்கவிற்கு எதிரான நம்பிக்கையில்லா பிரேரணைக்கு ஆதரவாக வாக்களித்து அரசாங்கத்தின் கூட்டு பொறுப்புக்கு பங்கம் விளைவித்தமையை அடிப்படையாக கொண்டு சுதந்திரக் கட்சியை பிரதிநிதித்துவப்படுத்தும் அமைச்சர்கள், இராஜாங்க அமைச்சர் மற்றும் பிரதி சபாநாயகர் ஆகியோருக்கு எதிராக நம்பிக்கையில்லா பிரேரணையை இன்று கையளிக்க நாம் தயாராக  இருந்தோம்.

இதன்படி இந்த நம்பிக்கையில்லா பிரேரணைக்கு 20 பேர் கையொப்பமிட்டுள்ளனர். எனினும் இன்றைய தினம் அனுதாப பிரேரணை விவாதத்திற்கு எடுக்கப்பட்டமையினால் சபாநாயகர் கரு ஜயசூரிய தமது சபாநாயகர் ஆசனத்தில் இருந்து எழுந்து வெளியே வரவில்லை. இதன் காரணமாக இன்று பிற்பகல் 2 மணிக்கு கையளிக்கவிருந்த நம்பிக்கையில்லா பிரேரணையை எங்களால் கையளிக்க முடியாமல் போனது.

எனினும் சிறிலங்கா சுதந்திரக்கட்சியினர் 16 பேருக்கு எதிரான நம்பிக்கையில்லா பிரேரணையை திங்கட்கிழமை காலை சபாநாயகர் கரு ஜயசூரியவிடம் கையளிக்கவுள்ளோம் என்று தெரிவித்துள்ளார்.

ஊடகவியலாளர் கேள்வி:-  சுதந்திரக் கட்சியினருக்கு எதிரான நம்பிக்கையில்லா பிரேரணையை கையளிக்க வேண்டாம் என ஜனாதிபதி மைத்திரிபால சிறிசேன தெரிவித்தமைக்காகவா நம்பிக்கயைில்லா பிரேரணையை நீங்கள் கையளிக்கவில்லை?

பதில் - இல்லை. இல்லை. ஜனாதிபதி மைத்திரிபால சிறிசேன அப்படி ஒன்றும் எமக்கு கூறவில்லை என்று இக்கேள்விக்கு பாராளுமன்ற உறுப்பினர் முஜிபுர் ரஹ்மான் பதிலளித்தார்.