ரோஹிங்கியா அகதிகளை அச்சுறுத்தி போராட்டம் நடத்திய ரத்னசார தேரருக்கு 30 ஆம் திகதி வரை விளக்கமறியல்

ரோஹிங்கியா அகதிகளை அச்சுறுத்தி போராட்டம் நடத்திய

ரத்னசார தேரருக்கு 30 ஆம் திகதி வரை விளக்கமறியல்

சிங்கள ஜாதிக்க பலவேகவின் செயலாளர் அரம்பேபொல ரத்னசார தேரரை எதிர்வரும் 30 ஆம் திகதி வரையில் விளக்கமறியலில் வைக்குமாறு கல்கிஸ்ஸை மஜிஸ்ட்ரேட் நீதிமன்றம் உத்தரவிட்டுள்ளது.

கல்கிஸ்ஸை மஜிஸ்ட்ரேட் நீதிபதி மொஹமட் மிஹால் இந்த உத்தரவை பிறப்பித்துள்ளார்.

குறித்த தேரர் அடையாள அணிவகுப்பொன்றுக்கும் உட்படுத்தப்படவுள்ளதாகவும் தெரிவிக்கப்படுகின்றது.

கல்கிசையில் UNHCR அனுசரணையில் தங்கவைக்கப்பட்டிருந்த ரோஹிங்கியா அகதிகளை அச்சுறுத்தியமை மற்றும் அவர்களுக்கு எதிராக போராட்டம் நடத்தியமை தொடர்பில் கடந்த சில வாரங்களாக பொலிஸாரால் தேடப்பட்டு வந்த தேரர், நேற்று நிட்டம்புவயில் வைத்து கைது செய்யப்பட்டார்.

இதன்போது தேரரிடமிருந்து இரு தேசிய அடையாள அட்டைகளை பொலிஸார் மீட்டுள்ளதாகவும் பொலிஸ் ஊடகப் பேச்சாளர் கூறியிருந்தார்.

இச்சம்பவத்துடன் தொடர்புடையதாக கூறப்படும் சந்தேக நபர்கள் ஏழு பேர் கைது செய்யப்பட்டனர். இவர்களில் ஐவர் பிணையில் விடுவிக்கப்பட்டனர். இன்னும் இருவர் எதிர்வரும் 30 ஆம் திகதி வரையில் விளக்கமறியலில் வைக்கப்பட்டுள்ளனர் என்பது குறிப்பிடத்தக்கது.

.பொலிஸ் மா அதிபர் பூஜித் ஜயசுந்தரவின் தொலைபேசி இலக்கத்துக்கு கிடைத்த இரகசிய தகவல் அடிப்படையிலேயே சந்தேக நபர் நேற்றுக் காலை கைது செய்யப்பட்டதாக பொலிஸ் ஊடகப் பேச்சாளர் ருவன் குணசேகர நேற்று தெரிவித்தார்.

சந்தேக நபர் கண்டியிலிருந்து கொழும்பு நோக்கி பயணம் செய்த பஸ் நேற்று அதிகாலை நிட்டம்புவ பிரதேசத்தில் இடைமறிக்கப்பட்டு, இவர் கைது செய்யப்பட்டதாகவும் அவர் கூறினார். கைதின்போது சந்தேக நபரிடமிருந்து இருவேறு பெயர்களைக் கொண்ட இரண்டு தேசிய அடையாள அட்டைகளை பொலிஸார் மீட்டுள்ளனர். சந்தேக நபர் 1992 ஆம் ஆண்டு டிசம்பர் (05) குருநாகலையில் பிறந்தவராவார்.

இவரது ஒரு அடையாள அட்டையில் அரம்பேபொல ரத்தன சாரர் தேரர் எனும் பெயரும் இல.86,பூர்வாராம வீதி, கொழும்பு 05 என்ற முகவரியும் காணப்படுகிறது. இந்த அட்டை 2011 ஆம் ஆண்டு டிசம்பர் (09 ) விநியோகிக்கப்பட்டுள்ளது. மற்றைய தேசிய அடையாள அட்டையில் தென்னகோன் முதியன்சலாகே சாமர தர்மசிறி தென்னகோன் எனும் பெயரும், தெற்கு களுத்துறை தூவபன்சல வீதி எனும் முகவரியும் காணப்படுகிறது. சாதாரண குடிமகனைப்போன்ற புகைப்படத்தைக் கொண்டுள்ள இந்த அட்டை 2017 ஆம் ஆண்டு ஜுலை (05) விநியோகிக்கப்பட்டுள்ளது.

இரண்டு தேசிய அடையாள அட்டைகளைக் கொண்டுள்ளதால் இவர் பாரிய குற்றச் செயல்களுடன் தொடர்புபட்டிருக்கலாம் என்ற சந்தேகம் எழுந்திருப்பதாகவும் பொலிஸ் பேச்சாளர் கூறினார். அத்துடன் கல்கிஸ்ஸையில் ரோஹிங்கிய அகதிகள் மீதான தாக்குதல் சம்பவத்தன்று, அரம்பேபொல ரத்தனசார தேரர் மிகவும் ஆக்ரோஷமாக நடந்து கொண்டதையும் இனவாதத்தை தூண்டும் வகையில் பாரதூரமான வார்த்தைப் பிரயோகங்கள் பிரயோகித்தமையும் சி.சி ரி.வி கமரா மூலம் ஔிப்பதிவாகியிருப்பதாக பொலிஸ் பேச்சாளர் சுட்டிக்காட்டினார்.

தலைமறைவாகியிருந்த அரம்பேபொல ரத்தனசார தேரரை சுமார் ஒரு மாத காலமாக பொலிஸார் தேடி வந்திருந்த நிலையிலேயே நேற்றுக் காலை அவர் கைது செய்யப்பட்டார். அவர் தலைமறைவாகியிருக்க உதவியவர்கள் மீதும் பொலிஸ் திணைக்களம் சட்ட நடவடிக்கை எடுக்கும் என்றும் அவர் கூறினார்.

பொலிஸ்மா அதிபரின் பணிப்புரையின் பேரில் பொலிஸ் தலைமையகத்திலுள்ள பொலிஸ் குழுவே நேற்றுக் காலை தேரர் பயணம் செய்த கொழும்பு, கண்டி பஸ்ஸை நிட்டம்புவ பிரதேசத்தில் வைத்து இடைமறித்து அவரைக் கைது செய்துள்ளது.

ரோஹிங்கிய அகதிகள் மீதான தாக்குதல் சம்பவம் தொடர்பில் இதுவரை ஒரு பெண் உள்ளிட்ட எட்டு பேர் சந்தேகத்தின்பேரில் கைது செய்யப்பட்டனர். இவர்களுள் இருவர் தொடர்ந்தும் விளக்கமறியலில் வைக்கப்பட்டுள்ளமை குறிப்பிடத்தக்கது.