ஐ.எஸ். தலைவர் அல்-பாக்தாதி ஈராக் படையினரால் சுற்றிவளைப்பு? பிரிட்டன் "இண்டிபெண்டன்ட்' நாளிதழில் தகவல்

ஐ.எஸ். தலைவர் அல்-பாக்தாதி

ஈராக் படையினரால் சுற்றிவளைப்பு?

பிரிட்டன் "இண்டிபெண்டன்ட்' நாளிதழில் தகவல்

இஸ்லாமிய தேச (ஐ.எஸ்.) தீவிரவாத அமைப்பின் தலைவர் Abu Bakr al-Baghdadi அல்-பாக்தாதியை, ஈராக்கின் மொசூல் நகரில் அந்த நாட்டுப் படையினர் சுற்றி வளைத்துள்ளதாக பிரிட்டனிலிருந்து வெளிவரும் "இண்டிபெண்டன்ட்' நாளிதழ் தெரிவித்துள்ளது.

இதுகுறித்து அந்த நாளிதழில் வெளியான தகவல்: கடந்த 2014-ஆம் ஆண்டு ஈராக்கிலும், சிரியாவிலும் கணிசமான பகுதிகளைக் கைப்பற்றி, அங்கு "இஸ்லாமியப் பேரரசை' நிறுவியதாக அறிவித்து உலகை அதிர்ச்சியில் ஆழ்த்தியவர் ஐ.எஸ். தீவிரவாத அமைப்பின் தலைவர் அபூபக்கர் அல்-பாக்தாதி.

அடுத்தடுத்து வெற்றிகளைக் குவித்ததும், தன்னை "இஸ்லாமியப் பேரரசராக' அறிவித்துக் கொண்டதும் அல்-பாக்தாதியை சக்தி வாய்ந்த தலைவராக்கியது.

இந்தச் சூழலில், ஐ.எஸ். தீவிரவாதிகள் தங்களிடமுள்ள நிலப்பரப்பை கொஞ்சம் கொஞ்சமாக இழந்து வரும் நிலையில், அல்-பாக்தாதி மொசூல் நகரில் பதுங்கியுள்ளதாகக் கூறப்படுகிறது.

இதுகுறித்து குர்துப் படையினரின் தலைமைத் தளபதி ஃபாத் ஹுசைன் கூறியதாவது:

கடந்த எட்டு அல்லது ஒன்பது மாதங்களாக ஐ.எஸ். தலைவர் அல்-பாக்தாதி மொசூல் நகரில் பதுங்கியுள்ளார்.

இந்தச் சூழலில், மொசூலை மீட்பதற்காக ஈராக் படைகள் அந்த நகரை சுற்றி வளைத்து முன்னேறி வருகின்றனர். இதன்மூலம், அல்-பாக்தாதி ஈராக் ராணுவத்தினரிடம் பிடிபடுவதோ, அல்லது கொல்லப்படுவதோ உறுதியாகிவிட்டது.

எனினும், அல்-பாக்தாதி மொசூல் நகரில் இருப்பதால் அந்த நகரை மீட்பதற்கான சண்டை மிகுந்த தீவிரமானதாக இருக்கும். அல்-பாக்தாதியைப் பாதுகாப்பதற்காக ஐ.எஸ். தீவிரவாதிகள் தங்கள் இறுதி மூச்சுவரை உக்கிரமாகப் போரிடுவார்கள் என்பதால், நகருக்குள் ஈராக் படையினரின் முன்னேற்றம் மிகக் கடுமையானதாக இருக்கும்.

எனினும், அந்த நகரம் மீட்கப்படுவதோடு அல்-பாக்தாதிக்கு முடிவு கட்டப்படும் என்பதால், அது ஐ.எஸ் தீவிரவாத அமைப்புக்கு மரண அடியாக இருக்கும்.

ஏற்கெனவே ஐ.எஸ். தீவிரவாத அமைப்பின் முக்கிய தலைவர்கள் கொல்லப்பட்ட நிலையில், அல்-பாக்தாதிக்குப் பதிலாக புதிய தலைவரைத் தேர்ந்தெடுப்பதில் அந்த அமைப்புக்கு மிகுந்த சிரமம் ஏற்படும்.

வேறு யார் தலைவராகத் தேர்ந்தெடுக்கப்பட்டாலும், அவருக்கு அல்-பாக்தாதியைப் போன்ற வசீகரம் இருக்காது என்று ஃபாத் ஹுசேன் கூறியுள்ளார். இவ்வாறு "இண்டிபெண்டன்ட்' நாளிதழ் தெரிவித்துள்ளது.

இதேவேளை, மோசமான வானிலை காரணமாக மொசூல் நகருக்குள் முன்னேறும் நடவடிக்கை தாற்காலிகமாக நிறுத்தி வைக்கப்பட்டுள்ளதாக ஈராக் ராணுவம் தெரிவித்துள்ளது.