மூன்றாவது திருமணம் செய்தார் இம்ரான் கான் ஆன்மீக ஆலோசகரை கைப்பிடித்தார்

மூன்றாவது திருமணம் செய்தார் இம்ரான் கான்

ஆன்மீக ஆலோசகரை கைப்பிடித்தார்

முன்னாள் கிரிக்கெட் வீரர் மற்றும் பாகிஸ்தான் "தெஹ்ரீக் ஈ இன்சாப்" கட்சி தலைவரான இம்ரான்கான் 3ஆவது முறையாக திருமணம் செய்து கொண்டார்.

அணியின் கப்டனாக இம்ரான் கான் இருந்த போது கடந்த 1992ஆம் ஆண்டு உலக கிண்ணத்தை பாகிஸ்தான் கிரிக்கெட் அணி தன் வசப்படுத்திக் கொண்டது.

கிரிக்கெட்டில் இருந்து விலகிய பின் பாகிஸ்தான் "தெஹ்ரீக் ஈ இன்சாப்" என்ற தனி கட்சியை தொடங்கி வழிநடத்தி வருகிறார் இம்ரான்கான்.

இங்கிலாந்து நாட்டு கோடீஸ்வரரின் மகளான ஜெமிமா கோல்ட்ஸ்மித் மற்றும் இம்ரான் கான் திருமணம் 1995ஆம் ஆண்டு நடைபெற்றது.  இவர்களுக்கு 2 மகன்கள் உள்ளனர்.  9 வருட திருமண வாழ்க்கைக்கு பின் இருவரும் விவாகரத்து பெற்றனர்.

அதன்பின் 2015ஆம் ஆண்டில் தொலைக்காட்சியில் நிகழ்ச்சி நடத்துபவரான ரேஹாம் மற்றும்  கான் திருமணம் நடந்தது.  10 மாதங்களில் இந்த திருமணம் முடிவுக்கு வந்தது.

இந்நிலையில் 40 வயதான பஷ்ரா மேனகா என்பவரை ஆன்மீக ஆலோசனை பெறுவதற்காக இம்ரான்கான் சந்தித்து உள்ளார். இம்ரான்கானின் கட்சி பற்றிய மேனகாவின் அரசியல் கணிப்புகள் சில உண்மையான நிலையில் அவருடனான நெருக்கம் அதிகரித்தது.

இதனை தொடர்ந்து 5 குழந்தைகளை பெற்றவரான மேனகா தனது கணவரை விவாகரத்து செய்துள்ளார்.  கடந்த மாத தொடக்கத்தில் இம்ரான் கானை திருமணம் செய்ய ஒப்பு கொண்டுள்ளார்.

இந் நிலையில் லாஹூரில் உள்ள மேனகாவின் சகோதரர் இல்லத்தில் நேற்று இம்ரான்கான் மற்றும் மேனகா திருமணம் எளிமையான முறையில் நடந்து முடிந்தது.

இந்த திருமணத்தில் இம்ரான்கானின் சகோதரிகள் கலந்து கொள்ளவில்லை.  2 முறை விவாகரத்து ஆன நிலையில் சகோதரிகள் மீது கானுக்கு நம்பிக்கை இல்லாத காரணத்தினால் 3ஆவது திருமணத்திற்கு அவர்களை அழைக்கவில்லை என கூறப்படுகிறது.