புகையிரதத்துடன் வாகனமொன்று மோதி விபத்து - ஏறாவூரில் சம்பவம்

ஏறாவூரில் தேவாபுரம் புகையிரத நிலையம் அருகிலுள்ள புகையிரதக் கடவையில் வாகனமொன்று ஒயில் விநியோகத்தில் ஈடுபடும் புகையிரதத்துடன் மோதி விபத்திற்கு உள்ளாகியுள்ளதாக பொலிஸார் தெரிவித்துள்ளனர்.

இந்த விபத்து இன்று காலை இடம்பெற்றுள்ளதுடன், பேக்கரி பொருட்களை விற்பனை செய்யும் வாகனமொன்றே பொலன்னறுவையிலிருந்து மட்டக்களப்பு நோக்கிச் சென்று கொண்டிருந்த புகையிரதத்தில் மோதியுள்ளது.

குறித்த விபத்தில் வாகனத்தைச் செலுத்திச் சென்ற பேக்கரி உரிமையாளரான தம்பிராசா சிவநேசன் (வயது 60) என்பவரும், உதவியாளராகச் சென்ற சித்தாண்டியைச் சேர்ந்த எஸ்.நிரோஷன் (வயது 18) என்பவரும் படுகாயமடைந்த நிலையில் மட்டக்களப்பு போதனா வைத்தியசாலையில் அனுமதிக்கப்பட்டுள்ளனர்.

சம்பவம் இடம்பெற்றபோது புகையிரதக் கடவையில் காவலாளிகள் எவரும் கடமையில் இருக்கவில்லை என்று தெரிவிக்கப்படுவதுடன், மேலதிக விசாரணைகளை பொலிஸார் மேற்கொண்டு வருகின்றனர்.