ஒருநாள் தரவரிசை: சாம்பியன்ஸ் கிண்ணத்தை வென்ற பாகிஸ்தான் 6-வது இடத்திற்கு முன்னேற்றம் ஸ்ரீலங்கா 8 –வது இடத்தில்

சாம்பியன்ஸ் டிராபி கிண்ணத்தை வென்றதன் மூலம் ஒருநாள் கிரிக்கெட் போட்டிக்கான ஐ.சி.சி. அணிகள் தரவரிசையில் பாகிஸ்தான் 95 புள்ளிகளுடன் 6-வது இடத்திற்கு முன்னேறியுள்ளது.

ஐ.சி.சி. சாம்பியன்ஸ் டிராபி கிரிக்கெட் தொடர் தொடங்கும்போது பாகிஸ்தான் ஐ.சி.சி. ஒருநாள் கிரிக்கெட் தொடருக்கான அணிகள் தரவரிசையில் 8-வது இடத்தில் இருந்தது. இந்தியாவிற்கு எதிரான முதல் போட்டியில் தோல்வியடைந்த பின், அனைத்து போட்டிகளிலும் வென்று கிண்ணத்தைக் கைப்பற்றியுள்ளது.

இதன்மூலம் அணிகள் தரவரிசையில் 8-வது இடத்தில் இருந்து 6-வது இடத்திற்கு முன்னேறியுள்ளது. இதனால் 2019-ம் ஆண்டு நடைபெற இருக்கும் உலகக்கிண்ணத்திற்கான நேரடி தகுதிச் சுற்றுக்கு முன்னேறும் வாய்ப்பை பிரகாசப்படுத்தியுள்ளது.

தென்ஆப்பிரிக்கா 119 புள்ளிகளுடன் முதல் இடத்திலும், ஆஸ்திரேலியா 117 புள்ளிகளுடன் 2-வது இடத்திலும், இந்தியா 116 புள்ளிகளுடன் 3-வது இடத்திலும் இங்கிலாந்து 113 புள்ளிகளுடன் 4 வது இடத்திலும் நியூசிலாந்து 111 புள்ளிகளுடன் 5-வது இடத்திலும் பங்களாதேஷ் 94 புள்ளிகளுடன் 7-வது இடத்திலும் ஸ்ரீலங்கா 93 புள்ளிகளுடன் 8-வது இடத்திலும்   உள்ளது.