லிபியாவில் படகு கவிழ்ந்து விபத்து 300-க்கும் மேற்பட்டோர் பலி!

லிபியாவில் படகு கவிழ்ந்து விபத்து

300-க்கும் மேற்பட்டோர் பலி!

லிபியாவில் இருந்து இத்தாலிக்கு குடியேற முயன்ற 300-க்கும் மேற்பட்டோர் கடலில் மூழ்கி உயிரிழந்த சம்பவம் ஒன்று இடம்பெற்றுள்ளது. இச்சம்பவம் அப்பிராந்தியத்தில் பெரும் சோகத்தை ஏற்படுத்தி உள்ளது.

மோசமான வானிலையால் படகு கவிழ்ந்து இந்த விபத்து ஏற்பட்டுள்ளதாக அறிவிக்கப்படுகின்றது. சட்டவிரோதமாக குடியேறுவதற்காக லிபியாவின் திரிபோலி நகருக்கு அருகே கடற்கரையில் இருந்து 4 படகுகளில் அகதிகளாக ஏராளமானோர் பயணம் செய்தனர் எனக் கூறப்படுகின்றது. இத்தாலியில் உள்ள தீவு ஒன்று அருகே படகுகள் சென்ற போது மோசமான வானிலை காரணமாக இந்த  விபத்து ஏற்பட்டிருக்கிறது.

8 மீற்றர் உயரத்துக்கு எழுந்த இராட்ச அலைகளாலும் கடும் குளிரினாலும் இந்த துயரம் நிகழ்ந்ததாகக் கூறப்படுகின்றது. ஒவ்வொரு படகிலும் 100 பேர் இருந்துள்ளனர். தகவல் அறிந்த இத்தாலி மீட்பு படையினர் விரைந்து சென்று மீட்பு நடவடிக்கையில் ஈடுபட்டனர். இரு படகுகளில் இருந்து மொத்தம் 9 பேர் மீட்கப்பட்டுள்ளனர். 300-க்கும் மேற்பட்டோர் உயிரிழந்து இருக்கலாம் என்று அஞ்சப்படுவதாக வெளிநாட்டு ஊடகங்கள் செய்திகளை வெளியிட்டுள்ளன.