அமெரிக்காவில் பால்கனி இடிந்து விழுந்து 6 மாணவர்கள் பலி பிறந்தநாள் விருந்து உண்டு கொண்டாடியபோது விபரீதம்

அமெரிக்காவில் பால்கனி இடிந்து விழுந்து 6 மாணவர்கள் பலி

பிறந்தநாள் விருந்து உண்டு கொண்டாடியபோது விபரீதம்

அமெரிக்காவில் பால்கனி இடிந்து விழுந்த விபத்தில் 6 மாணவர்கள் பரிதாபமாக உயிரிழந்துள்ளனர். 7 பேர் படுகாயம் அடைந்தனர்.

பிறந்தநாள் விருந்து உண்டு கொண்டாடியபோது இந்த விபரீதம் நிகழ்ந்துள்ளது. இறந்துபோன மாணவர்கள், அயர்லாந்து நாட்டை சேர்ந்தவர்கள். அமெரிக்காவின் கலிபோர்னியா மாகாணம், பெர்க்ளி பகுதியில் உள்ள கல்லூரியில் அயர்லாந்து நாட்டை சேர்ந்த மாணவர்கள் படிக்கின்றனர். அங்குள்ள ஒரு அடுக்குமாடி குடியிருப்பில் தங்கியிருந்து கல்லூரி செல்கின்றனர். 5வது தளத்தில் தங்கியிருக்கும் இவர்கள், நேற்று மாணவன் ஒருவரின் பிறந்தாள் விழாவை கொண்டாடினர்.

15க்கும் மேற்பட்ட மாணவர்கள் இந்த விருந்து உபசாரத்தில் கலந்து கொண்டனர். பெரும்பாலானோர் குடியிருப்பின் பால்கனியில் நின்று பேசிக்கொண்டிருந்தனர். திடீரென பால்கனி இடிந்து அங்குள்ள நடைபாதையில் விழுந்தது. சுமார் 50 அடி உயரத்தில் இருந்து பால்கனி இடிந்து விழுந்ததால், 6 மாணவர்கள் பரிதாபமாக உயிரிழந்தனர். 7 பேர் படுகாயம் அடைந்தனர். அக்கம்பக்கத்தினர் ஓடிவந்து இடிபாடுகளில் சிக்கியவர்களை மீட்டனர். தகவலறிந்து வந்த பொலிஸார், காயமடைந்தவர்களை மருத்துவமனையில் சேர்த்தனர். படுகாயம் அடைந்த அனைவரும் ஆபத்தான நிலையில் சிகிச்சை பெற்று வருகின்றனர் எனத் தெரிவிக்கப்படுகின்றது . உயிரிழந்த மாணவர்கள் அனைவரும் சுமார் 21 வயதானவர்கள் எனவும் அறிவிக்கப்படுகின்றது.

பால்கனி இடிந்து விழுந்து மாணவர்கள் விபத்துக்குள்ளான சம்பவம் அயர்லாந்து நாட்டில் பெரும் அதிர்ச்சியை ஏற்படுத்தியுள்ளது. அந்நாட்டு பிரதமர் இரங்கல் தெரிவித்துள்ளார். பால்கனியில் அளவுக்கு அதிகமானோர் நின்றிருந்ததே விபத்துக்கு காரணம் என கட்டிட பொறியாளர்கள் தெரிவித்துள்ளனர். விபத்து குறித்து தீவிர விசாரணை நடைபெற்று வருகிறது. விபத்து குறித்து அடுக்குமாடி குடியிருப்பில் இருந்த நபர் கூறுகையில், ‘‘பால்கனி இடிந்து விழுந்ததால் கட்டிடத்தில் அதிர்வு ஏற்பட்டது. நிலநடுக்கம் வந்துவிட்டதோ என எண்ணினேன். ஓடி வந்து ஜன்னல் வழியாக பார்த்தபோது, சிலர் தரையில் கிடந்தது தெரியவந்தது’’ என்று தெரிவித்துள்ளார்.   

வெளிநாட்டு மாணவர்கள் அமெரிக்காவில் தங்கி படிப்பது, வேலை செய்வது, கோடைகால முகாம்களில் பங்கேற்பது போன்றவற்றுக்காக ஆண்டுதோறும் சுமார் 1 லட்சம் பேருக்கு அமெரிக்கா விசா வழங்குகிறது. அந்த விசா மூலம் அயர்லாந்தை சேர்ந்த ஏராளமான மாணவர்கள் அமெரிக்காவில் தங்கியுள்ளனர் என்பது குறிப்பிடத்தக்கது.