பள்ளிவாசல் அருகே மர்ம நபர்கள் சரமாரி துப்பாக்கி சூடு - 8 பேர் காயம் பிரான்ஸில் சம்பவம்

பிரான்ஸில் பள்ளிவாசல் அருகே மர்ம நபர்கள் நடத்திய துப்பாக்கி சூட்டில் 8 பேர் காயம் அடைந்தனர். தெற்கு பிரான்ஸில் அவிக்னான் பகுதி உள்ளது. அங்கு அர்ராமா என்ற பள்ளிவாசல் உள்ளது. நேற்று இரவு 10.30 மணியளவில் பள்ளிவாசலில் இருந்து பலர் வெளியே வந்த கொண்டிருந்தனர். அப்போது அங்கு வந்த 2 மர்ம வாலிபர்கள் தாங்கள் வைத்திருந்த துப்பாக்கிகளால் சரமாரியாக சுட்டனர். இதனால் அங்கு பதட்டமும் பரபரப்பும் ஏற்பட்டது. துப்பாக்கி சூட்டில் 8 பேர் காயம் அடைந்தனர் அவர்களில் 4 பேர் ஒரே குடும்பத்தை சேர்ந்தவர்கள் அவர்களில் 7 வயது சிறுமியும் அடங்குவார். இத்தாக்குதல் தீவிரவாதத்தால் நடைபெற்றது இல்லை என அதிகாரி ஒருவர் தெரிவித்துள்ளார். இளைஞர்களுக்கு இடையே ஏற்பட்ட பிரச்சினையால் இத்தாக்குதல் நடைபெற்றது என்றார். பாரீஸ் புறநகரான கிரேடில் பகுதியில் கடந்த 4 நாட்களுக்கு முன்பு பள்ளிவாசல் அருகே கூட்டத்தினர் மீது கார் ஏற்றிய நபர் கைது செய்யப்பட்டார். இது போன்ற சம்பவங்கள் அடிக்கடி நடப்பதால் பிரான்ஸின் முக்கிய நகரங்களில் பொலீஸ் பாதுகாப்பு அதிகரிக்கப்பட்டுள்ளது.