எரிந்த நிலையில் மாணவியின் சடலம் மீட்பு காரைதீவில் சம்பவம்

எரிந்த நிலையில் மாணவியின் சடலம் மீட்பு

காரைதீவில் சம்பவம்

தனது வீட்டு மண்டபத்தில் பிரத்தியேக வகுப்பிற்கு தயாராகிக் கொண்டிருந்த பாடசாலை மாணவி ஒருவர் சடலமாக மீட்கப்பட்டுள்ளார்.

சம்மாந்துறை பொலிஸ் பிரிவிற்குட்பட்ட காரைதீவு 10 குறிச்சி பகுதியில் இன்று (7) காலை இச்சம்பவம் இடம்பெற்றுள்ளது.

இச்சம்பவம் தொடர்பில் தெரியவருவதாவது,

பிரத்தியேக வகுப்பிற்கு  தயாராகியவேளை குறித்த பாடசாலை மாணவி மீது திடீரென தீப்பற்றி எரிந்த நிலையில் தரையில் வீழ்ந்து இவ்வாறு உயிரிழந்துள்ளார்.

சடலமாக மீட்கப்பட்டவர் காரைதீவு, கதிர்காமத் தம்பி வீதியைச் சேர்ந்த நடேஸ்வரராஜன் அக்ஸயா (வயது-17) என்பவர்எனத் தெரிவிக்கப்படுகின்றது.

சம்பவம் இடம்பெற்ற வேளை தீப்பற்றி எரிந்த மாணவியின் தாய், தந்தை எவரும் வீட்டில் இருக்கவில்லை என தெரிவிக்கப்படுகிறது.

குறித்த மாணவியின் சகோதரர் மாத்திரமே இந்த சம்பவத்தை முதலில் அவதானித்து அயலவர்களுக்கு தகவல் தெரிவித்துள்ளார்.

அத்துடன் குறித்த நேரத்தில் பரவியிருந்த தீயினை அயலவர்களின் உதவியுடன் அணைத்ததாகத் தெரிவிக்கப்பட்டுள்ளது.

சடலமாக மீட்கப்பட்டவர் காரைதீவு விபுலானந்தா மத்திய கல்லூரியில் க.பொ.த உயர்தரத்தில் முதலாம் ஆண்டில் பௌதீக விஞ்ஞான பிரிவில் கல்வி பயிலும் மாணவி  எனத் தெரிவிக்கப்படுகின்றது.

சம்மாந்துறை பொலிஸார்  மாணவியின் திடீர் மரணம் தொடர்பில் விசாரணைகளை மேற்கொண்டு வருகின்றனர்.