போர் நிறுத்தத்தை மீறி இஸ்ரேல் - ஹமாஸ் மீண்டும் மோதல்: பாலஸ்தீனியர்கள் 17 பேர் பலி

காஸா பகுதியில் வெள்ளிக்கிழமை மூன்று நாள் போர் நிறுத்தத்தை மீறி மீண்டும் இஸ்ரேல் - ஹமாஸ் இடையே சண்டை மூண்டது. இதில் பாலஸ்தீனியர்கள் 17 பேர் கொல்லப்பட்டனர். இஸ்ரேல் தரப்பில் படைவீரர்கள் 3 பேர் கொல்லப்பட்டனர்.

ஐ.நா., அமெரிக்கா ஆகியவற்றின் போர் நிறுத்த உடன்படிக்கை அறிவிப்பை கிரீன்வீச் நேரப்படி இன்று காலை 5 மணிக்கு இஸ்ரேல் - ஹமாஸ் இருதரப்பும் முறித்துக் கொண்டு மீண்டும் சண்டையில் ஈடுபட்டன. நான்காவது வாரமாக இரு தரப்புக்கும் தொடரும் சண்டையில், போர் நிறுத்தத்துக்கு எந்த வித உத்தரவாதத்தையும் தரமுடியாது என ஏற்கெனவே அமெரிக்க வெளியுறவு அமைச்சர் ஜான் கெர்ரி அறிவித்திருந்தார். இஸ்ரேல்- ஹமாஸ் இரு தரப்புமே போர் நிறுத்தத்தை மதிப்பதாக முன்னர் கூறியிருந்த போதிலும், அதனை முறித்துக் கொண்டு மீண்டும் சண்டையைத் தொடர்ந்துள்ளன.

முன்னதாக மனித நேய அடிப்படையில், குறைந்தது 4 சண்டை நிறுத்த அறிவிப்பை வெளியிட்டு, பின்னர் மனஸ்தாபங்களால் மீண்டும் அடுத்த சில மணி நேரங்களிலேயே சண்டையை இருதரப்புமே தொடர்ந்துள்ளன.

இந்நிலையில் வியாழக்கிழமை நேற்று மாலை தனது தரப்பில் 5 வீரர்கள் உயிரிழந்தாக இஸ்ரேல் தெரிவித்திருந்தது.

கடந்த மாதம் 8ஆம் திகதி தொடங்கிய இந்தச் சண்டையில் இதுவரை 1464 க்கும் மேற்பட்ட பாலஸ்தீனியர்கள் கொல்லப்பட்டுள்ளனர். இஸ்ரேல் தரப்பில் இதுவரை 61 இராணுவ வீரர்களும், பொதுமக்கள் 3 பேரும் கொல்லப்பட்டுள்ளனர் என்று தெரிவிக்கப்பட்டிருந்தது.