அரிய வகை நோயினால் பாதிக்கப்பட்டும் முகத்தில் தவழும் குழந்தையின் புன்னகை

அரிய வகை நோயினால் பாதிக்கப்பட்டும்

முகத்தில் தவழும் குழந்தையின் புன்னகை

உலகின் மிகவும் அரிய வகை நோய் ஒன்றினால் ஒவ்வொரு நொடியும் நரக வேதனையை அனுபவித்து வந்தாலும் தன் புன்னகையால் அனைவரையும் மயக்கி விடும் மாயக் சிறுவன்தான் ஏடன்.

கடந்த 5 வருடங்களாக ஏடனும் அவனது பெற்றோரும் அனுபவித்த வலியை வார்த்தைகளால் விவரித்து விட முடியாது. பிறக்கும் போதே ஏடன் உடலில் பல இடங்கள் இயற்கைக்கு மாறாக அதீத வளர்ச்சியடைந்திருந்தது. அவனைப் பரிசோதித்த மருத்துவர்கள் அவனுக்கு பியோடஸ் சிண்ட்ரோம் எனப்படும் உடல் மற்றும் மன நலக் குறைபாடுகள் இருப்பதைக் கண்டறிந்தனர். சிறிது காலத்திற்கு பிறகு அவனது சதைகள் அறுவை சிகிச்சை மூலம் அகற்றப்பட்டது. ஆனால் அதன் பின்னர் ஏடனின் உடல் மூச்சுவிடத் திணறும் அளவிற்கு மோசமடைந்தது.

ஏடனைப் பற்றி அவர் தாய் கூறுகையில் முதன் முதலாக ஏடனை வீட்டுக்கு கூட்டி வந்த போது அக்கம் பக்கத்தில் இருப்பவர்கள் எல்லாம் பயந்து ஓடி விட்டனர். அவனால் பேச முடியாது, நடக்க முடியாது. கழுத்துப்பகுதியில் தொங்கும் கட்டியால் முகத்தை அசைக்க முடியாமல் அவன் அனுபவித்த  நரக வேதனையை அனுபவித்ததாக வேதனையுடன் நினைவு கூர்ந்தார். வீட்டிலேயே அடைந்து இருக்கிறானே என வெளியே கூட்டிச் சென்றால் பார்ப்பவர்கள் எல்லாம் உன் மகனின் உடல் ஏன் ஆங்காங்கே வீங்கியிருக்கிறது என்று துக்கம் விசாரிப்பார்கள் என்றார்.

சில மாதங்களுக்கு முன் குழந்தைகள் நல மருத்துவர் ஒருவரைச் சந்தித்த ஏடனின் பெற்றோருக்கு அவரது வார்த்தைகள் மிகுந்த நம்பிக்கையளித்தது. ஏடனுக்கு 'க்ளோவ் சிண்ட்ரோம்' எனப்படும் மிகவும் அரிதான மரபியல் கோளாறு இருப்பதாக அம்மருத்துவர் தெரிவித்தார். அவனது முகத்தின் சதைகளுக்குள்ளே நோயால் சிதைந்து போன நரம்புகளை நீக்கும் அறுவை சிகிச்சையை செய்வதாக தெரிவித்தார்.

5 மணி நேரத்திற்கும் மேலாக நடந்த அறுவை சிகிச்சைக்குப் பின்னர் தற்போது ஏடனின் உடல் நிலையில் சிறிதளவு முன்னேற்றம் ஏற்பட்டுள்ளது. தற்போது பாடசாலைக்குச்  சென்று வரும் ஏடன் மீது பாடசாலை மாணவர்களும் ஆசிரியர்களும் அன்பாக நடந்து கொண்டு அவனை மகிழ்வித்து வருகின்றனராம்.

கேம்ப்ரிட்ஜ் பல்கலைக்கழகத்தின் மருத்துவர் குழு எதிர்வரும் ஜூலை மாதம்  தொடங்கி 6 மாதங்கள் ஏடனுக்கு சோதனை சிகிச்சை ஒன்றை மேற்கொள்வதாக அறிவித்துள்ளனராம். இந்த சிகிச்சைக்குப் பின்னர் ஏடனும் மற்ற குழந்தைகளைப் போல் மாறி விடுவான் என்று அவனது பெற்றோர், உறவினர்கள் நம்பிக்கையுடன் இருக்கின்றனர்.