முஸ்லிம்களின் கடைகளுக்கு செல்லக்கூடாது மகாநாயக்கரின் கூற்றுக்கு பிக்குகள் தரப்பிலிருந்தே கண்டனங்கள்!

முஸ்லிம்களின் கடைகளுக்கு செல்லக்கூடாது

மகாநாயக்கரின் கூற்றுக்கு

பிக்குகள் தரப்பிலிருந்தே கண்டனங்கள்!

உலகிலேயே மிக உன்னதமான அகிம்சையை போதித்த புத்த பெருமானின் போதனைகளை மக்களுக்கு போதிக்கும் பௌத்த பிக்கு ஒருவர் மற்றுமொரு இனத்தவர்களுக்கு எதிராக இவ்வாறு கருத்துக்களை கூறக் கூடாது

முஸ்லிம் சமூகத்திற்கு எதிராக மிக கொடூரமான இனவாதத்தை சிங்கள பௌத்த மக்கள் மத்தியில் உபதேசம் செய்த பிரதான சிங்கள பௌத்த தலைமை பீடமான அஸ்கிரிய பீடத்தின் மகாநாயக்கரின் கூற்றுகளுக்கு பௌத்த பிக்குகள் தரப்பிலிருந்தே கண்டனங்கள் எழுந்திருக்கின்றன.

                                                                                                                           

உலகிலேயே மிக உன்னதமான அகிம்சையை போதித்த புத்த பெருமானின் போதனைகளை மக்களுக்கு போதிக்கும் பௌத்த பிக்கு ஒருவர் மற்றுமொரு இனத்தவர்களுக்கு எதிராக இவ்வாறு கருத்துக்களை கூறக் கூடாது என்றும் அவ்வாறு கூறுபவரை பௌத்தம் ஏற்றுக்கொள்ளப் போவதில்லை என்று புத்த பெருமானே மிகத் தெளிவாக தனது போதனைகளில் குறிப்பிட்டிருப்பதாக களனி பல்கலைக்கழகத்தின் சிரேஷ்ட விரிவுரையாளரான கலாநிதி கல்கந்தே தம்மாநந்த தேரர் கூறியிருக்கின்றார்.

“பொதுவாக மனிதர்கள் நம்புவது ஏதாவது ஒன்று நடந்தால் கொலை செய்ய வேண்டும் அப்படி இல்லாவிட்டால் பாதிப்பை ஏற்படுத்தியவருக்கு பதிலுக்கு பாதிப்பை ஏற்படுத்த வேண்டும் என்பது அது உலகில் மனிதன் உருவான காலத்தில் இருந்தே கடைபிடிக்கப்பட்டுவரும் ஒரு முறை. இதுதான் சரியானது என்றும் ஏற்றுக்கொண்டும் வந்துள்ளனர். ஆனால் பௌத்த தர்மத்திற்கு அமைய அவ்வாறான நடவடிக்கைகள் சரியானவை என்று கூறக்கூடிய ஒரு வார்த்தையும் இல்லை. புத்தரின் போதனைகளில் துன்புறுத்தல் தொடர்பில் உலக நடைமுறைக்கு முற்றிலும் மாறுபட்டதாகவே காணப்படுகின்றன. அவற்றை மிகவும் தெளிவாக புத்த பெருமான் போதித்தும் இருக்கின்றார்.

அனைவரும் துன்புறுத்தலை கண்டு அஞ்சுகின்றனர். மரணத்தை கண்டு அச்சம்கொள்கின்றனர். இந்த விடையங்கள் பாலி மொழியிலான கதைகளின் ஊடாகவும் மிகத் தெளிவாக கூறப்பட்டிருக்கின்றது. அத்துடன் பௌத்த தர்மத்தை போதிக்கும் போது அடிக்கடி கூறும் வார்த்தை தான் மைத்ரி என்பது. மைத்ரி என்றால் ஒரு தாய் தனது குழந்தைக்கு ஆபத்து நேரிடும் போது அவரது உயிரையும் பணயம்வைத்து குழந்தையை பாதுகாக்க முற்படுவது.

அதேவேளை அனைத்து ஜீவராசிகள் மீதும் அன்பையும், கருணையையும் காட்டுவது. அதேவேளை தங்களுக்கு எதிரானவர்கள் என்று கருதுபவர்களுக்கும் அன்பை பரப்புங்கள் என்பது. அதாவது எதிர்ப்பை வெளிப்படுத்துபவர்களையும் எந்தவித பாகுபாடும் இன்றி அன்போடு அவர்களுடன் பழக வேண்டும் என்று புத்தர் மிகத் தெளிவாக போதித்திருக்கின்றார்.

அதிலும் பௌத்த பிக்குகளுக்கு அதனைவிட ஒரு படி மேல் சென்று அனைவரிடத்திலும் அன்பை வெளிப்படுத்துமாறு புத்தர் போதித்திருக்கின்றார். அதாவது பௌத்த பிக்கு ஒருவரை மரத்தில் கட்டிவைத்து கூரிய ஆயுதத்தால் கை கால்களை துண்டு துண்டாக வெட்டி எறியும் போதும் வெட்டுபவனை பார்வையாலும் குரோதத்துடனோ, ஆத்திரத்துடனோ பார்க்கக் கூடாது. அவ்வாறு செய்தால் குறித்த பௌத்த பிக்கு தனது போதனைகளை பரப்புபவராக ஏற்றுக்கொள்ள மாட்டேன் என்று புத்த பெருமான் மிகத்தெளிவாக கூறியிருக்கின்றார்”.

எவ்வாறாயினும் ஜூன் 16 ஆம் திகதியன்று கண்டியில் பெசோன் பௌர்ணமி தினத்தை முன்னிட்டு நடைபெற்ற சமய நிகழ்வொன்றில் கலந்துகொண்டிருந்த அஸ்கிரிய பீடத்தின் மகாநாயக்கர் வரக்காகொட சிறி ஞானரத்ன தேரர், முஸ்லிம்களின் கடைகளுக்கு சிங்கள பௌத்தர்கள் செல்லக்கூடாது என்றும் அதன் ஊடாகவே சிங்கள பௌத்த சமூகம் தங்களை பாதுகாத்துக்கொள்ள முடியும் என்றும் குறிப்பிட்டிருந்தார்.

“ முஸ்லீம் மக்கள் எம்மை விரும்பவில்லை. அதனால் முஸ்லீம் கடைகளுக்கு போகவேண்டாம் என்று நானும் கூறுகின்றேன். அந்தக் கடைகளில் சாப்பிடாதீர்கள். எதனையும் வாங்கிக் குடிக்காதீர்கள். ஏனெனில் எமது சமூகத்திற்கு விசத்தை கொடுத்து அழிக்க முயற்சித்தவர்கள் அவர்கள். இது அனைவரும் அறிந்த விடையம். அதனால் பௌத்த மக்கள் தங்களை பாதுகாத்துக்கொள்ள வேண்டும். அதனால் முஸ்லிம் கடைகளுக்கு போகவேண்டாம். முஸ்லிம் கடைகளில் உணவுகளை வாங்கி உண்ட எமது இளைய சமூகத்திற்கு எதிர்கால சந்ததியொன்று இருக்காது என்று நான் நினைக்கின்றேன்”.

சிங்கள பெண்களுக்கு கருத்தடை செய்ததாக சிங்கள ஊடகங்களினால் குற்றச்சாட்டு சுமத்தப்பட்டுள்ள முஸ்லிம் மருத்துவரான சாஃபியை கற்களால் எறிந்து படுகொலை செய்ய வேண்டும் என்று சிங்கள சமூகத்தினால் முன்மொழியப்படும் யோசனைக்கும் அஸ்கிரிய மகாநாயக்கத் தேரர் தனது அனுமதியை வழங்கினார்.

“கடந்த காலங்களில் இடம்பெற்ற சம்பவங்களை பார்க்கும் போது இந்த நாட்டின் சந்ததியினரின் எதிர்காலம் நாசமாகிவிட்டது. மருத்துவர் ஒருவர் செய்த வீரதீர செயலை அனைவரும் அறிவர். லட்சக் கணக்கான எமது குழந்தைகளை அழித்துவிட்டார். இவ்வாறான தேசத் துரோகிகளுக்கு வாழ இடமளிக்கக்கூடாது. எனது விகாரைக்கு வரும் அம்மாமார்கள் மருத்துவரை கற்களால் அடித்து கொல்ல வேண்டும் என்கின்றனர். நான் அவ்வாறு சொல்லவில்லை. எனினும் அதுதான் நடக்க வேண்டும். இவ்வாறான குற்றங்களை எமது இனத்தைச் சேர்ந்த ஒருவர் செய்திருந்தால் வெட்டி கூறு போட்டிருப்போம். இந்த இடத்தில் சட்ட திட்டங்களில் எந்தவித பிரயோசனமும் இல்லை. பௌத்தர்களாகிய நாம் அனைவரும் ஒன்றிணைய வேண்டும். இதற்கு முன்னர் செயற்படடது போல், கட்சி, நிறங்களை மறந்து தகுதியானவர்களை தெரிவுசெய்து ஆட்சியில் அமர்த்த நடவடிக்கை எடுக்க வேண்டும்” என அவர் தெரிவித்திருந்தார்