மாமனிதர் மர்ஹும் எம்.எச்.எம்.அஷ்ரஃபின் அகால மரணம் பற்றிய மர்மம் இன்றுவரை நீடிகவே செய்கின்றது முஸ்லிம் காங்கிரஸின் தவிசாளர் பஷீர் சேகுதாவூத்

மாமனிதர் மர்ஹும் எம்.எச்.எம்.அஷ்ரஃபின்

அகால மரணம் பற்றிய மர்மம்

இன்றுவரை நீடிகவே செய்கின்றது

முஸ்லிம் காங்கிரஸின் தவிசாளர் பஷீர் சேகுதாவூத்

முஸ்லிம் மக்களில் பெரும்பான்மையினரால் பெருந்தலைவராக ஏற்றுக்கொள்ளப்பட்ட மறைந்த மாமனிதர் மர்ஹும் எம்.எச்.எம்.அஷ்ரஃப் முஸ்லிம் மக்களுக்கு அரசியல் முகவரி பெற்றுத்தந்த சரித்திர நாயகன் அன்னாரின் அகால மரணம் தொடர்பாக முஸ்லிம் காங்கிரஸின் தவிசாளர் பஷீர் சேகுதாவூத் 16 வருடங்களுக்குப்பின் கட்சித் தலைவர் அமைச்சர் ரவூப் ஹக்கீம் அவர்களுக்கு எழுதியுள்ள கடிதம் ஒன்றில் தொட்டுக் காட்டியுள்ளார்

2000 ஆம் ஆண்டு செப்டெம்பர் மாதம் 16ம் திகதி நிகழ்ந்த தலைவர் அஷ்ரஃப் அவர்களின் அகால மரணம் பற்றிய மர்மம் இன்றுவரை நீடிகவே செய்கின்றது என பஷீர் சேகுதாவூத் தான் எழுதிய கடிதத்தில் சுட்டிக்காட்டியுள்ளார்.

மாமனிதர் மர்ஹும் எம்.எச்.எம்.அஷ்ரஃப் அவர்களின் மரணம் விபத்து அல்ல அது விடுதலைப் புலிகளின் உதவியுடன் நடத்தப்பட்ட ஒரு சதி என்று இன்று வரை பலர் நம்பிக் கொண்டிருக்கின்றனர்.

இதற்கு அவர்கள் கூறும் காரணம் மர்ஹும் எம்.எச்.எம்.அஷ்ரஃப் அவர்களின் நம்பிக்கைக்கு உரிய ஒருவராக வீரமுனையைச் சேர்ந்த ஒருவர் இருந்தார். குறிப்பிட்ட இந்த நபரும்  அஷ்ரஃப் அவர்களும் ஒன்றாகத்தான் மரணிப்போம் என மிக நெருக்கமான நண்பர்களுக்கு இந்நபர் கூறி வந்திருக்கிறார். எம்.எச்.எம்.அஷ்ரஃப் மரணமடைந்த போது அந்த நபரும் அஷ்ரபுடன் மரணமடைந்தார்.

இந்த நபர் மரணமடைந்ததன் பின்னர் இந்நபரை மாவீரராக பெயர் குறிப்பிட்டு புலிகள் அஞ்சலி செலுத்தியதாக செய்திகள் வெளியாகியிருந்தன.

இப்படியான நிலையில் மாமனிதர் மர்ஹும் எம்.எச்.எம்.அஷ்ரஃப் அவர்களின் அகால மரணத்தில் இன்றுவரை மர்மம் நீடிக்கின்றது. என்று முஸ்லிம் காங்கிரஸ் தவிசாளர் பஷீர் சேகுதாவூத் 16 வருடங்களுக்குப்பின் பிரஸ்தாபித்திருப்பது அஷ்ரபின் அகால மரணம் தொடர்பாக இன்றைய நல்லாட்சி அரசாங்கத்தின் காலத்தில் மீள் விசாரணையை ஆரம்பிப்பதற்கான ஆரம்பமாக அமையலாம் என நம்பப்படுகின்றது.

தமிழ் அரசியல்வாதிகள், ஊடகவியலாளர்கள் போன்றவர்களின் அகால மரணம் தொடர்பான விசாரணைகளை மீள ஆரம்பித்திருப்பது போன்று எம்.எச்.எம்.அஷ்ரஃப் அவர்களின் அகால மரணம் தொடர்பான விசாரணைகள் இந்த நல்லாட்சி அரசாங்கத்தில் ஆரம்பிக்கப்படுமா என மக்கள் கேள்வி எழுப்புகின்றனர்.

மாமனிதர் மர்ஹும் எம்.எச்.எம்.அஷ்ரஃப் அகால மரணமடைந்து எதிர்வரும் செப்டம்பர் மாதம் 16ஆம் திகதி 16ஆண்டுகளாகின்றன. இன்னும் அவருடைய அகால மரணம் பற்றிய மர்மம் துலக்கப்படவில்லை. சந்தேகங்கள் விலக்கப்படவில்லை.

முஸ்லிம் காங்கிரஸின் தலைவராக இருந்துவரும் அமைச்சர் ரவூப் ஹக்கீம் மாமனிதர் அஷ்ரஃப் அகால மரணமான ஆரம்பத்தில் ஆவேசமாகப் பேசிவந்தார். தற்போது 16 ஆண்டுகள் கடந்தும் அன்னாரின் மரணம் குறித்து அமைச்சர் ரவூப் ஹக்கீம் மெளனம் சாதித்தே வருகின்றார்.

மர்ஹும் அஷ்ரஃபினால் வளர்க்கப்பட்டவர்கள்.அன்னாரின்மீது நம்பிக்கை கொண்டவர்கள், அவர்மீது விசுவாசம் கொண்டவர்கள், அன்னாரை உண்மையாக நேசிப்பவர்கள், அவருடைய பெயரால் அரசியல் நடத்திக் கொண்டிருப்பவர்கள் மாமனிதர் அஷ்ரஃபின் மரணத்தின் மர்மத்தை துலக்கவும் சந்தேகங்களை நீக்கவும் உண்மைகளை வெளிக்கொணரவும் நடவடிக்கை எடுக்க வில்லையே என மக்கள் ஆதங்கப்பட்டுக் கொண்டே இருக்கின்றனர்.

மாமனிதர் அஷ்ரஃபின் மரணம் தொடர்பான மர்மம் இன்னும் மக்களுக்கு வெளிப்படுத்தாத நிலையிலேயே அன்னாரின் வாழ்வியல் தடயங்களை வைத்து பலரும் அரசியல் நடத்திக் கொண்டிருப்பதை மக்கள் கவலையோடு ஆவேசம் தெரிவித்து வருகின்றனர்.

முஸ்லிம் காங்கிரஸ் தலைவர் அமைச்சர் ரவூப் ஹக்கீம் மாமனிதர் அஷ்ரஃபின் மரணம் தொடர்பாக கடந்த 2001 ஆம் ஆண்டு ஆகஸ்ட் மாதம் 10 ஆம் திகதி கல்முனை நகர மண்டபத்திற்கு முன்னால் இடம்பெற்ற ‘மக்கள் நீதிமன்றத்திற்கு முன் முறையீடு”  என்னும் தலைப்பிலான பொதுக்கூட்டத்தில் நிகழ்த்திய உரையை மர்ஹும் அஷ்ரஃபின் விசுவாசிகள் பலரும் நினைவுபடுத்திக்கொண்டிருக்கின்றனர்.

முஸ்லிம் காங்கிரஸ் தலைவர் அமைச்சர் ரவூப் ஹக்கீம் அக்கூட்டத்தில் என்ன பேசினார்?

“தலைவர் அஷ்ரஃபின் மரணத்தின் பின்னணியிலே நடந்த பல விடயங்கள் இன்னும் பகிரங்கமாகச் சொல்லப்படாத விடயங்களாகவே இருக்கின்றன. அப்படியான பல விடயங்கள் எங்களுக்கு கிடைத்துக் கொண்டிருக்கின்றன. பலர் நேரில் வந்தும் எங்களிடம் சொல்கிறார்கள். எழுதியும் தருகிறார்கள். கறுப்புப் பெட்டி கண்டுபிடிக்கப்பட்டதாகவும் அது ஒரு ஆட்டோவில் கொண்டு செல்லப்பட்டதாகவும் எங்களுக்கு தகவல் கிடைத்துள்ளது.

மறைந்த தலைவருக்கு என்ன நடந்தது என்பதை நாம் பார்க்கவேண்டும். மறைந்த தலைவரோடு கடைசி மணித்தியாலங்களில் இருந்த பலர் உள்ளனர். பலவிதமான திடுக்கிடும் தகவல்களை அவர்கள் சொல்லுகிறார்கள்.

விசாரணைக்கு முன்வரும்வரை பொறுமையாக இருந்து இந்த விடயங்களை வெளியிடலாம் என உத்தேசித்திருக்கிறேன்.“ இவ்வாறு அமைச்சர் ரவூப் ஹக்கீம் பெருந்திரளாகக் கூடியிருந்த மக்கள் மத்தியில் பேசுகையில் 14 வருடங்களுக்கு கூறியிருந்தார்.

அன்னாரின் மரணம் சம்பவித்து பதினைந்து ஆண்டுகளாகியும் இன்னும் அமைச்சர் ரவூப் ஹக்கீம் பொறுமையாகவே இருக்கின்றார். ஆனாலும் அவருடைய பெயரால் அரசியல் நடத்திக் கொண்டிருக்கிறார்கள் என ஆரம்பகால கட்சிப் போராளிகள் பலர் கவலையோடும் கரிசனையோடும் ஆவேசமாகக் கூறிக் கொண்டுதான் இருக்கின்றார்கள்.

 இதேவேளை, ஆணைக்குழு நியமித்து விசாரணை நடத்தப்பட்டு அன்னாரின் மரணம் பற்றிய உண்மைகள் வெளிக்கொணரப்படும் என பிரதமர் ரணில் விக்கிரமசிங்க எதிர்கட்சியில் இருந்தபோது கடந்த 2000.10.04 ஆம் திகதி சாய்ந்தமருது தாமரை மைதானத்தில் இடம்பெற்ற பொதுக்கூட்டம் ஒன்றில் முஸ்லிம் சமூகத்திற்கு வாக்குறுதி ஒன்றை அளித்திருந்ததையும் மக்கள் நினைவு கூர்ந்து அந்த வாக்குறுதியும் காற்றில் பறந்துவிட்டதே என்று கவலை தெரிவிக்கிறார்கள்.

மாமனிதர் அஷ்ரஃபின் அகால மர்ணம் குறித்து பிரதம மந்திரி ரணில் விக்கிரமசிங்க முஸ்லிம் சமூகத்திற்கு அன்று என்ன வாக்குறுதி வழ்ங்கினார்?

“இந்நாட்டில் ஐக்கிய தேசியக் கட்சி ஆட்சி அமைத்த பின் மர்ஹும் அஷ்ரஃபின் அகால மரணம் குறித்து நாங்கள் ஒரு பூரண விசாரணை நடத்துவோம். இதற்கென அமைக்கப்படும் விசாரணைக் குழுவில் மர்ஹும் அஷ்ரஃபின் குடும்பத்தைச் சேர்ந்த ஒருவரையும் நியமிப்போம்.

அமைச்சர் அஷ்ரஃபின் மரணத்தில் சந்தேகம் எழும்போது இம்மரணத்தின் காரணம் என்ன? இதன் பின்னணி என்ன? இவற்றையெல்லாம் நாட்டு மக்கள் அறிந்து கொள்ள வேண்டும்.

நானும் அஷ்ரஃபும் அரசியலில் வேறுபட்டிருந்தாலும் அன்னாரும் நானும் நல்ல நண்பர்கள். குறைந்தபட்சம் ஒரு நண்பர் என்ற முறையிலாவது விசாரணைக்குழுவை நியமித்து உண்மையைக் கண்டறியவேண்டிய கடப்பாடு எனக்குண்டு.

அமைச்சர் அஷ்ரஃபின் மரணம் தொடர்பாக எமது விமானப் படையினர் மீது குற்றத்தை சுமத்திவிட்டு எவரும் விலகிச் சென்றுவிட முடியாது.“ இவ்வாறு பிரதம மந்திரி ரணில் விக்கிரமசிங்க 14 வருடங்களுக்கு முன் உறுதி மொழி ஒன்றை வழங்கியிருந்தார்.

இவர்களின் பேச்சுகளுக்கும் உறுதி மொழிகளுக்கும் என்ன நடந்துவிட்டது? எல்லாம் காற்றில் பறந்துவிட்டனவா? என்று மக்கள் கேள்வி எழுப்புகின்றனர்.

-          மக்கள் விருப்பம்