சென்னைக்கு எதிராக சன்ரைசர்ஸ் அபார வெற்றி

சென்னைக்கு எதிராக சன்ரைசர்ஸ் அபார வெற்றி

ராஞ்சியில் நடைபெற்ற சென்னை சூப்பர் கிங்ஸ்க்கு எதிரான போட்டியில் சன்ரைசர்ஸ் அணி 6 விக்கெட்டுகள் வித்தியாசத்தில் அபார வெற்றி பெற்றது. முன்னதாக டாஸ் வென்ற சன்ரைசர்ஸ் அணி முதலில் பந்து வீச்சை தேர்வு செய்தது. இதனை அடுத்து களமிறங்கிய சென்னை அணி நிர்ணயிக்கபட்ட 20 ஓவர்களில் 3 விக்கெட்டுகளை இழந்து 185 ஓட்டங்கள் குவித்தது. சென்னை அணியில் டோனி, டேவிட் ஹஸ்ஸி ஆகிய இருவரும் சிற்பபாக ஆடி அரை சதம் அடித்து அசத்தினர். டோனி 57, டேவிட்ஹஸ்ஸி 50, ஓட்டங்களுடன் இறுதிவரை ஆட்டமிழக்காமல் களத்தில் இருந்தனர். மேலும் வேய்ன் ஸ்மித் 47 ஓட்டங்கள் எடுத்து ஆட்டமிழந்தார்.

இதனை அடுத்து 186 ஓட்டங்கள் எடுத்தால் வெற்றி என்ற இலக்குடன் களமிறங்கிய சன்ரைசர்ஸ் அணியின் தொடக்க ஆட்டக்காரர்களாக களமிறங்கிய டேவிட் வார்னர் மற்றும் தவான் ஆகிய இருவரும் அதிரடியாக ஆடி அரைசதம் அடித்தனர். குறிப்பாக டேவிட் வார்னர் சென்னை பந்து வீச்சை நாலாபுறமும் சிதறடித்தார். வார்னர் 45 பந்துகளில் 12 பவுண்டரி, 3 சிக்சர் உள்பட 90 ஓட்டங்கள் எடுத்து ஆட்டமிழந்தார். இதனால் சன்ரைசர்ஸ் அணி 19.4 ஓவர்களில் 4 விக்கெட்டுகளை இழந்து 189 ஓட்டங்கள் எடுத்து 6 விக்கெட்டுகள் வித்தியாசத்தில் அபார வெற்றி பெற்றது.

தவான் 64 ஓட்டங்கள் எடுத்து இறுதி வரை ஆட்டமிழக்காமல் வெற்றியை வசப்படுத்தினார். இறுதியாக ஆடிய டோனியின் சொந்த ஊரான ராஞ்சியில் நடைபெற்ற 2 ஆட்டங்களிலும் சென்னை அணி தோல்வியை தழுவியது குறிப்பிடத்தக்கது.